بنجيك يا هجليج . . .

رد مجادعة وطنية بيني و بين صديقي الشاعر أحمد محمد صالح بادي .....

و الله يا ود بادي للقلب متَّع
و لي سنن الجهاد خليتنا نِسْتَرْجَع
على ميادين الجهاد خطانا تتسارع
و لي نيل الشهادة شوقنا جد ولّع
****
بنجيكِ يا هجليج الليلة . . بل هسع
نرفع لوا السودان و نور النّصُر يسطع
بنسقي عدوك السم .. سماً زعاف ينقع
و للعديل و الزين شهيدنا يتربع
****
قول لي عدونا هناك أركز تعال أرجع
و لعت نيرانا كيفن تفوت تلكع
البيولع النيران مفروض يقيف يدفع
و البادي بنتمو و في نمولي رح تسمع
****
جيشنا و دبابين قلناها ما بنرجع
بنخوض لنيرانا و تلقونا في المعمع
نضرب لكل خاين لمّا يتوجع
و يندم على الفكرة الفي غفلة ليها شرع
****
البيدوس على طرفنا حاشانا ما بنطمع
غير ما نرد الصاع .صاعين . . و ما بنقنع
جيناكا يا خاين الليلة وين تنجع
أكيد حا تتمنى لو انك طفل ترضع
****
بنجيك يا هجلج الليلة بل .. هسّع
نضمد جراحاتك و بي دمانا نتبرّع
نهديكِ أرواحنا غالي و نفيس ندفع
و تهدينا خيراتك ضي البروق يشلع
****
بنعز جدودنا زمان الوصونا ما نركع
و نعيد لأمجادنا و ذكريات تلمع
في فضا التاريخ أقمار نجوم تسطع
في كل حروباتنا جندينا كان أشجع
****
أمريكا يا خاين عاد ليك ما بتشفع
جيناك بكل الويل نسقيك و تتكرع
و حين تبلغ الحلقوم الروح محال ترجع
بايديك حَفَرْ قبرك عاد فيهو زين أرتع