الحبُ عَرَفة .. الى ملهمتي ..

الحبُ عَرَفة

الهوى و الحب عَرَفة الشوق و الغرام
الروح تهاتي بيك لولاك مافي وئام
نبض القلب يهديك في كل لحظة هيام
كل جمال مسّاك ساحراني عيون
***
معاك الحياة تحلا تهل نجوم السعد
صوتك محنّة نغيم تطربلو دنيا الوجد
واحشاني عينيك خديك شفايفك ورد
فيض الحنان جواك عادَل حنان الكون
***
عَرَفة الفؤاد ضُلك في الهجير يبراك
و الحنايا تنوم تصحا على ذكراك
كل الحواس تهنا و كتين تشوف محياك
دايماً هواي و الشوق نيران زايدة أتون
***
عَرَفة العناد طيفك كل ما مسكتو جفل
أصلو الربيع قيفك هدامو واقف تل
يتوجس الخيفة قلبي حاشا و كل
أغرق وسط موجك شُطّانك شواهدي تكون
***
قمر الزمان انتي النجوم تهواك
عصب الحنان انتي الحنايا حِماك
طيب الحسان انتي العبير عماك
قلبي يتبع ليك لهفان و بيك مفتون
***
لو ترضي قالديهو حضنك يواسيهو
وهجك يدفّيهو من زمهرير تيهو
شوفتك ترضّيهو راحتك تكفّيهو
ريقك بيرويهو لو قبلة واحدة تكون
***
ملسوع شفاي عندك بي لمسة من حنّك
لو نظرة من عينيك شاور لي بي رمشك
بس انتي ختيني لو ثانية في قلبك
بيها تكون سلواي مبسوط أفارق الكون