بلادي .. أهلاً . . .

بسم الله والحمد لله والصلاة والسلام علي رسول الله نبينا حبيبنا محمد
و سائر الأنبياء عليهم صلوات ربي وسلامه . .

هنالك من الشعراء الأدباء الذين هاموا حباً بأوطانهم ونظموا الكلمات بعد أن طوعوها درراً تزين لابسيها و تسر ناظريها وتفوح عطراً يعبق الأجواء حول متنسِميها .. لا ننسي قول شاعر:
وطني ولو شغلت بالخلد عنه * لنازعتني اليه في الخلد نفسي
وقول آخرٍ:
بلادي و ان جارت عليا عزيزة * أهلي و ان ضنوا عليا كرام
فأى حب يفوق حب الوطن وأهله ياتري!!
شاعرنا أديبنا اسماعيل حسن من أولئك الذين عشقوا الوطن فصاغ لؤلؤته الفريده رسالة لكل من يريد معرفة سوداننا الحبيب خيراته وطيبة أهله وكرمهم وشجاعتهم وورعهم وهي هدية لكل محب لبلده و تذكير لكل ابن عاق نسي في غفلة من الزمان أصله وهرول خلف وسواسه ليعوق مسيرة بلده أن هذه هي بلدك وأهلك مادين يداً بيضاء لتعود الي حضن وطنك و حنان أهله مشاركاً في مسيرته الماضية الي الأمام بإذن الله وحوله ...فهلاّ اقشعرت جلودكم و لانت قلوبكم للعود الحميد!!!
ومن شخصي الضعيف ..أقول:
***
بي حبك نظمنا أشعار يا سوداني
لحبك عزفنا أوتار يا سوداني
حبك في قلوبنا شعار يا سوداني
***
وهذه دعوة اسماعيل حسن **بلادي أهلاً**

بلادي اهلاً يا بلادي
الف تحية ليكي من الفؤادِ
بلادي اهلاً .. يا بلادي
صدورنا حماية ليكي من الاعادي

بلادي أنا بلاد ناساً في اول شي
موارثيم..كتاب الله
وخيل مشدود ، وسيف مسنون حداه درع
تقاقيبن تسرج الليل مع الحيران
وشيخاً في الخلاوي ورع

وكم نخلات تهبهب فوق جروفا الساب
وبقرة حلوبة تتضرّع وليها ضرع

وساقيةً تصحي الليل مع الفجراوي
يبكي الليل ويدلق في جداولو دمع
يخدر في بلادي سلام ..
خدرةً شاربة موية النيل تزغرد في البوادي زرع

بلادي سهول بلادي حقول
بلادي الجنة للشافوها او للبرة بيها سمع
بلاد ناساً تكرم الضيف
وحتى الطير يجيها جعان ومن اطراف تقيها شبع

بلاي أنا
تشيل الناس ، كل الناس
وساع بي خيرو لينا يسع
وتتدفق مياه النيل على الوديان
بياض الفضة في وهج الهجير بيشع

بلادي بلاد الصفقة والطمبور
وداراتاً تنح بالليل
وبنوتاَ تحاكي الخيل
يشابن زي جدّي الريل
وشبالن مكنتل في طريفو ودع

بلادي بلاد من التاريخ
من ترهاقا لا عند ميسنا ...
عاد ترجاك خيل ودروع

بلادي أمان ، بلدي حنان وناسا حُنان
يكفكفوا دمعة المفجوع
يحبو الدار يموتو عشان حقوق الجار
يخوضو النار شان فد دمعة
وكيف الحالة لو شافوها سايلة دموع ؟!

ديل اهلي .. ديل اهلي ..

يبدّوا الغير على زاتم
يقسموا اللقمة بيناتم
ويدّوا الزاد حتى ان كان مصيرم جوع

ديل اهلي .. ديل اهلي ..

ديل اهلي .. البقيف في الدارة
وسط الدارة واتنبر
وأقول لي الدنيا كل الدنيا
ديل أهلي

عرب ممزوجة بي دم الزنوج الحارة
ديل اهلي
ديل قبيلتي لما ادور افصل للبدور فصلي

اصحاب روحي والاحساس
وسافر في بحار شوقم زمان عقلي

أقول بعضي ...
ألاقيهم تسرّبوا في مسارب الروح
بقوا كُلي .. ديل اهلي

محل قبلت القاهم ..
معايا .. معايا زي ضلي

كان ما جيت من زي ديل وآسفاي وآماساتي وآآآآآآآذلي

تصور كيف يكون الحال لو ما كنت سوداني
واهل الحارة ما اهلي ؟؟

تصور كيف يكون الحال ؟!!

» بلادي يا سنا الفجرِ . . .