الرَّحمة تحت أقدامك . . (الى أمي)

الرحمة تحت أقدامك

يمّه الصبر في صبرك انتي احتار
شلتي الجبال يمّه ما ملتي لا لا محال
رغم الصعاب يمّه في الدنيا حالك حال
كم عدلتي للعوجات ما همّلتي يمّه عيال
كم شلهتك مرضان كم شلتي للأحمال
كم شهدوا ليكِ كواكب الضّلمة و الأهوال
الرحمة تحت أقدامك فيك صالح الأعمال
ليك تواضعت نيران لفحت وجوه لي رجال
لو كانوا حتى ملوك مالكين دول و أموال
بي أف تجيهم تارا دافر لهيبا أميال
***
كم ماتوا ليك شباب و دمعك جرى أنهار
ما لمتى يمّه قدر صبرك لبستي وقار
حزنك نبيل دافي خلى الجليد ينهار
راجين حجاك يا يمّه سيرة النبي المختار
لي حلبة نحنا رجينا فينا النعاس احتار
و الشاطر حسن يا يمّه كيف قاوم التيار
و صاحب الوزتين و الطيرة كيف بشتن الأشرار
خلا زعيمهم جنّا حلف يسيب الدّار
حجاك ثقافة تراث علمني أقول أشعار
كايسين عفوك يا يمّه شان نبرا من النار
ماها الخشب يا يمّه واقوده ناس و حجار
و طعامها من زقّوم ما رمّان و ثمار
شرابا الحميم يمّه علقم من الجبار
يشوي وجوه عاقّين ينصف يجيب التار
***
فيك الحنان يمّه دُخرينا في الأحزان
شربتي المراير يمّه شان نروى نحنا حنان
نبراك نشيلك غنوة نعبر بيك مدى الأحزان
ندعو ليك جزاك الجنّة استجيب دعانا يا رحمن