اقبل وين

هي احدى روائع الشاعر عبد الرحمن الجعلي

اقبل وين
كيف امرق من العسكر اقبل وين ؟
اخلي الكاكي لي زينوبة لي كلتوم
اسيب الخندق المبروك عشان اسكن بيوت الطين
ده مابصل وما حيكون وما في يوم سوي الشين
عشان الجندي واخلاصو وماني الدين
عشان الخندق المبروك بفتش لي ببي حزين
عشان انت يابلدي عشان طيبين
ده مابحصل وماحيكون
************
عشقنا الكاكي في الردمية عند البرية
وكت الطارة والجنزير يخشو الطين
عشقنا الكاكي صوت الدانة والجبخانة بابورأ مع الوزين
عشقنا الكاكي نسر الجو وفارسأ ضو متين ورزين
عشقنا الكاكيجندي مطيع ودفعة وديع ووكت الحارة احدب وشين
عشقنا الكاكي في كل حين وكل الكاكي طيب وزين
والجياشة ناس طيبين
الجياشي في المظهر يسر العين
والجياشي في المسجد سماحة ودين
والجياشي سند الواقعة .... سيف الصاقعة
والداقر البسم العين
**************
كيف امرق واقبل وين ؟
اكانن توريت بقيت خمارة شن معنانا ياعارفين
وكان الكاكي لبسو الخوة كيف نصبح من الصالحين ؟
وكان المسجد المعمور صبح مهجور منو البمرقا يوم الدين
يمين نمرق
خلاوي الفقرة تصبح ملهى لي الراقصات ولي الرااقصين
ويفتح نار المقرن يالاصق مسجد النيلين
يمين ننذل في الخرطوم نعيش تايهين
تياب اخواتنا تتشرط نشوف الذلة راي العين
يمين نمرق .....
يجو كم ناس قرن تار سين
يهدو مدارس الاطفال ويقفلو خلوة الذاكرين
يدفنو الشهدا في التاريخ وتبقى الرافعة لي لينين
وتتغير مياه النيل وتصبح فودكا في ها الحين
يمين نمرق....
مبادئ الشهدا ء والثورات تضيع في يوم
وتسقط ثورة التعليم وتهدم جامعة الخرطوم
وتبقى الفوضى لينا شعار وتشتاق العيون للنوم
والاخطر ..بنتمزق ...ونتفرق
حينشق الوطن نصين
ونحن الكاكي مابنسيبو الاعمايا او ميتين
اكان ايدينا تتقطع
نمسك الراية بي اسنانة والكرعين
وكان السوق يبق نيران ....
بناكل الحارة تغرق في الفقر والدين
واكن كل الدروب تنسد نهاجر للاله راضين
نحي رسولنا بي البوي ونقول جاهزين
نعيد الخدمة في السودان نعز الدين
نعيد الخدمة للسودان نعز الدين
******************